कसै पत्रको आधारमा विषादी परीक्षण गर्न सरकार पछि हटेको हैनः बाँस्कोटा

काठमाडौँ। सरकार कसैको पत्रले प्रभावित नहुने सञ्चार तथा सूचना प्रविधिमन्त्री गोकुलप्रसाद बाँस्कोटाले दाबी गरेका छन् ।

सरकारका प्रवक्ता समेत रहेका मन्त्री बाँस्कोटाले मंगलबार बसेको मन्त्रिपरिषद्को बैठकपछि सिंहदरबारमा सञ्चारकर्मीसँग कुरा गर्दै विषादी परीक्षण गर्ने सरकारको निर्णय फिर्ता लिने विषय कसैको पत्रका कारण नभएको प्रस्ट पारे ।

भारतको पत्रपछि सरकारले आफ्नो निर्णय फिर्ता लिएको समाचार सार्वजनिक भइरहेको बेला प्रवक्ता बाँस्कोटाले त्यसलाई अस्वीकार गरेका हुन् ।

परीक्षण गर्ने निर्णय फिर्ता लिए पनि प्रवक्ता बाँस्कोटाले आफूहरु देशको हितमा गम्भीरतापूर्वक लाग्ने बताए।

यसैबीच, उनले मंगलबारको बैठकमा आवश्यक सबै विषयमा छलफल भएको बताए । कानुन, नियमावली, सरुवा बढुवा लगायतका सबै विषयमा कुरा भएको उनले बताए ।

मन्त्रिपरिषद् हेरफेरको कुरा प्रधानमन्त्रीको नितान्त विशेषाधिकार भएको उनले दोहोर्‍याए । उनले भने ‘तपाईहरू कुहिरीमण्डलमा हुनुहुन्छ, त्योभन्दा माथि उठ्न आग्रह गर्दछु । ’