ग्लोबल आइएमई बैंकको कुल सम्पत्ति ८ खर्ब नाघ्यो, शेयरधनीलाई राम्रो प्रतिफलको संकेत

काठमाडौं । ग्लोबल आइएमई बैंक लिमिटेडले आर्थिक वर्ष २०८२/८३ को चौथो त्रैमाससम्मको अपरिष्कृत वित्तीय विवरण सार्वजनिक गर्दै अधिकांश वित्तीय सूचकमा उल्लेखनीय सुधार हासिल गरेको जनाएको छ। बैंकको खुद नाफा, सञ्चालन नाफा, कुल सम्पत्ति तथा लाभांश क्षमतामा अघिल्लो आर्थिक वर्षको तुलनामा सकारात्मक वृद्धि देखिएको छ।

सार्वजनिक विवरणअनुसार बैंकको खुद नाफा २२.६७ प्रतिशतले बढेर ६ अर्ब २२ करोड ७१ लाख रुपैयाँ पुगेको छ। अघिल्लो आर्थिक वर्षको सोही अवधिमा बैंकले ५ अर्ब ७ करोड ६३ लाख रुपैयाँ खुद नाफा आर्जन गरेको थियो।

समीक्षा अवधिमा बैंकको खुद ब्याज आम्दानी १६ अर्ब २० करोड ३० लाख रुपैयाँ रहेको छ। यद्यपि यो अघिल्लो आर्थिक वर्षको १६ अर्ब ६७ करोड ९९ लाख रुपैयाँको तुलनामा केही घटेको देखिन्छ।

बैंकको नाफा वृद्धिमा कर्जा नोक्सानी व्यवस्था (इम्पेयरमेन्ट चार्ज) मा आएको कमीले महत्वपूर्ण योगदान दिएको छ। अघिल्लो आर्थिक वर्षको ५ अर्ब ९७ करोड ८५ लाख रुपैयाँ रहेको यस्तो व्यवस्था २०.२४ प्रतिशतले घटेर ४ अर्ब ७८ करोड ८३ लाख रुपैयाँमा सीमित भएको छ। यसले कर्जा असुलीमा सुधार आएको संकेत गरेको छ।

त्यस्तै, बैंकको सञ्चालन नाफा २०.०३ प्रतिशतले बढेर ८ अर्ब ६८ करोड २१ लाख रुपैयाँ पुगेको छ। अघिल्लो आर्थिक वर्षमा सञ्चालन नाफा ७ अर्ब २३ करोड ३१ लाख रुपैयाँ रहेको थियो।

बैंकले आगामी लाभांश वितरणका लागि पनि बलियो वित्तीय आधार तयार गरेको छ। नियामकीय समायोजनपछि असार मसान्तसम्म बैंकको खुद वितरणयोग्य नाफा ३ अर्ब ५७ करोड ५४ लाख रुपैयाँ रहेको छ। अघिल्लो वर्षको सञ्चित नाफा तथा नगद लाभांश समायोजनपछि कुल वितरणयोग्य नाफा ४ अर्ब ५८ करोड १० लाख रुपैयाँ पुगेको छ। यस आधारमा बैंकको प्रतिशेयर वितरणयोग्य नाफा १२ रुपैयाँ २ पैसा कायम भएको छ।

बैंकको कुल सम्पत्ति १९ प्रतिशतभन्दा बढीले बढेर ८ खर्ब २० अर्ब ७७ करोड रुपैयाँ पुगेको छ। त्यस्तै, ग्राहक निक्षेप २१.५३ प्रतिशतले वृद्धि भई ६ खर्ब ६९ अर्ब १७ करोड रुपैयाँ पुगेको छ भने कर्जा प्रवाह ७.१३ प्रतिशतले बढेर ४ खर्ब ३९ अर्ब ३४ करोड रुपैयाँ पुगेको छ।

चुक्ता पूँजी ३६ अर्ब ११ करोड ५८ लाख रुपैयाँ रहेको बैंकको कुल इक्विटी सञ्चित नाफा तथा अन्य जगेडा कोषसहित ६९ अर्ब ८० करोड ६२ लाख रुपैयाँ पुगेको छ।

समीक्षा अवधिमा बैंकको नेट एनपीएल १.२२ प्रतिशतबाट घटेर ०.५९ प्रतिशतमा सीमित भएको छ। खराब कर्जामा आएको सुधार, नाफामा भएको वृद्धि तथा ४ अर्ब ५८ करोड रुपैयाँभन्दा बढी वितरणयोग्य नाफाले आगामी वार्षिक साधारण सभाबाट शेयरधनीले आकर्षक लाभांश प्राप्त गर्ने सम्भावना बलियो बनेको संकेत गरेको छ।