नाफादेखि लाभांश क्षमतासम्म एभरेस्ट बैंकको सशक्त प्रदर्शन

काठमाडौं । एभरेस्ट बैंक लिमिटेडले आर्थिक वर्ष २०८२/८३ को चौथो त्रैमाससम्मको अपरिष्कृत वित्तीय विवरण सार्वजनिक गर्दै खुद नाफा, सञ्चालन आम्दानी तथा लाभांश क्षमतामा सुधार भएको जनाएको छ। बैंकले समीक्षा अवधिमा अधिकांश वित्तीय सूचकमा सन्तुलित वृद्धि कायम राख्दै आफ्नो वित्तीय आधार थप सुदृढ बनाएको छ।

सार्वजनिक विवरणअनुसार बैंकको खुद नाफा अघिल्लो आर्थिक वर्षको तुलनामा ४.७५ प्रतिशतले बढेर ५ अर्ब ६ करोड ९९ लाख रुपैयाँ पुगेको छ। अघिल्लो वर्ष यही अवधिमा बैंकले ४ अर्ब ८३ करोड ९९ लाख रुपैयाँ खुद नाफा कमाएको थियो।

बैंकको मुख्य आम्दानी स्रोत रहेको खुद ब्याज आम्दानी पनि सामान्य वृद्धि हुँदै ९ अर्ब १९ करोड ४ लाख रुपैयाँ पुगेको छ। अघिल्लो आर्थिक वर्षमा यस्तो आम्दानी ९ अर्ब १० करोड २३ लाख रुपैयाँ रहेको थियो।

त्यस्तै, सेवा शुल्क तथा कमिसनबाट बैंकले २ अर्ब २० करोड ७८ लाख रुपैयाँ खुद आम्दानी गरेको छ। गैर-ब्याज आम्दानी तथा इम्पेयरमेन्ट चार्जमा आएको सुधारका कारण सञ्चालन आम्दानी ११ अर्ब ९६ करोड ४६ लाख रुपैयाँ पुगेको छ भने सञ्चालन नाफा १.८८ प्रतिशतले बढेर ७ अर्ब ३८ करोड ४४ लाख रुपैयाँ पुगेको छ।

निक्षेप र कर्जा विस्तारतर्फ पनि बैंकले सन्तुलित वृद्धि हासिल गरेको छ। समीक्षा अवधिसम्म ग्राहक निक्षेप ३ खर्ब १६ अर्ब ८ लाख रुपैयाँ पुगेको छ भने कर्जा लगानी २ खर्ब ३५ अर्ब ५६ करोड ८३ लाख रुपैयाँ पुगेको छ। अघिल्लो वर्ष बैंकको निक्षेप २ खर्ब ९८ अर्ब ८१ करोड रुपैयाँ र कर्जा २ खर्ब १३ अर्ब ४८ करोड रुपैयाँ रहेको थियो।

बैंकले आगामी लाभांश वितरणका लागि पनि बलियो आधार तयार गरेको छ। नियामकीय समायोजनपछि बैंकको कुल वितरणयोग्य मुनाफा ५ अर्ब २५ करोड ७८ लाख रुपैयाँ पुगेको छ। यसमध्ये समीक्षा अवधिको नाफाबाट मात्रै २ अर्ब ९५ करोड ३६ लाख रुपैयाँ लाभांश वितरणका लागि उपलब्ध रहेको छ।

बैंकको चुक्ता पूँजी १३ अर्ब ७२ करोड १३ लाख रुपैयाँ रहेको छ भने जगेडा कोष १५ अर्ब ७२ करोड ७८ लाख रुपैयाँ पुगेको छ। समीक्षा अवधिमा बैंकको प्रतिशेयर आम्दानी (ईपीएस) ३६ रुपैयाँ ९५ पैसा तथा प्रतिशेयर नेटवर्थ २५६ रुपैयाँ ४७ पैसा कायम भएको छ।

समग्र बैंकिङ क्षेत्रमा खराब कर्जाको दबाब कायम रहे पनि एभरेस्ट बैंकले कर्जाको गुणस्तर सुदृढ राख्न सफल भएको छ। बैंकको निष्क्रिय कर्जा (एनपीएल) ०.३८ प्रतिशतबाट सामान्य बढेर ०.४९ प्रतिशत पुगे पनि यो अझै बैंकिङ क्षेत्रकै न्यून स्तरमध्ये एक हो।

यस्तै, बैंकको आधार दर (बेस रेट) ४.२३ प्रतिशतमा झरेको छ भने स्प्रेड दर ३.०५ प्रतिशत कायम भएको छ। बैंकको पुँजी कोष पर्याप्तता अनुपात (सीएआर) १२.२३ प्रतिशत रहेको छ।

समग्रमा, एभरेस्ट बैंकले आर्थिक वर्ष २०८२/८३ मा नाफा, सञ्चालन आम्दानी, निक्षेप, कर्जा विस्तार तथा लाभांश क्षमतामा सुधार गर्दै बलियो वित्तीय प्रदर्शन गरेको देखिएको छ। न्यून खराब कर्जा, उच्च प्रतिशेयर आम्दानी र ५ अर्बभन्दा बढी वितरणयोग्य मुनाफाले आगामी लाभांशप्रति शेयरधनीको अपेक्षा थप बलियो बनाएको छ।