पिसाबसँग सम्बन्धित यी लक्षण देखिए मृगौला बिग्रँदै गएको संकेत हुन सक्छ

काठमाडौँ । मृगौला (किड्नी) मानव शरीरको एक अत्यन्त महत्वपूर्ण अङ्ग हो, जसले शरीरबाट विषाक्त पदार्थहरू बाहिर निकाल्ने र रगतलाई शुद्ध पार्ने कार्य गर्दछ। मृगौलालाई स्वस्थ राख्न प्रारम्भिक लक्षणहरू पहिचान गर्नु अत्यावश्यक हुन्छ, विशेषगरी पिसाबसँग सम्बन्धित परिवर्तनहरूलाई हल्का रुपमा लिनु हुँदैन।

विशेषज्ञहरूका अनुसार, मृगौला बिग्रन थालेको संकेत पिसाबमार्फत देखिन थाल्छ। यस्तो अवस्थामा लक्षणहरूबारे समयमै जानकारी लिएर उपचार सुरु गर्दा मृगौलाको समस्या गम्भीर हुनबाट रोक्न सकिन्छ।

यी हुन् मृगौला बिग्रँदै गएको संकेत दिने पिसाबसँग सम्बन्धित लक्षणहरू:

१. थोरै मात्रामा पिसाब लाग्नु:
यदि तपाईँले पर्याप्त पानी पिइरहनुभएको छ तर पनि पिसाब कम आउँछ भने यो मृगौला रोगको संकेत हुन सक्छ। सामान्य अवस्थामा तातो मौसम वा शरीरमा पानीको मात्रा कम हुँदा पनि पिसाब कम आउन सक्छ, तर लामो समयसम्म यस्तो समस्या रहेमा चिकित्सकको परामर्श लिनु आवश्यक हुन्छ।

२. पिसाबमा फोम देखिनु:
पिसाबमा अत्यधिक फोम देखिनु भनेको त्यसमा प्रोटिन निस्किन थालेको संकेत हुन सक्छ। मृगौला स्वस्थ भएमा प्रोटिन शरीरमै रहन्छ, तर मृगौलामा समस्या आउँदा प्रोटिन पिसाबमार्फत बाहिरिन थाल्छ।

३. राति बारम्बार पिसाब लाग्नु:
रातिको समयमा बारम्बार पिसाब लाग्नु मृगौला बिग्रन थालेको संकेत हुन सक्छ। यद्यपि यो समस्या प्रोस्टेट ग्रन्थि वा पिसाब नलीको सङ्क्रमणका कारण पनि हुन सक्छ, त्यसैले विशेषज्ञको सल्लाह लिनु उपयुक्त हुन्छ।

४. पिसाब गर्दा दबाब महसुस हुनु:
पिसाब गर्ने बेला अत्यधिक दबाब महसुस हुनु वा पिसाब निस्कँदा अप्ठ्यारो हुनु मृगौलासम्बन्धी समस्याको संकेत हुन सक्छ। यस्तो लक्षण देखिएमा ढिलाइ नगरी चिकित्सकसँग सम्पर्क गर्नु उपयुक्त हुन्छ।

५. पिसाबको रङ्ग परिवर्तन हुनु:
पिसाबको रङ्ग अत्यधिक पहेँलो, रातो वा दुर्गन्धयुक्त भएमा मृगौला समस्याको लक्षण हुन सक्छ। कहिलेकाहीँ संक्रमणका कारण पनि यस्तो परिवर्तन हुन सक्छ, तर दीर्घकालीन रूपमा यस्तो देखिए तुरुन्त परीक्षण गराउनु आवश्यक हुन्छ।

विशेषज्ञहरू भन्छन्, “मृगौला रोग सुरुमा नै पत्ता लगाउन सकेमा उपचार सम्भव छ, तर लक्षणलाई बेवास्ता गर्दा रोग जटिल बन्दै जान सक्छ।”

यदि तपाईँमा यस्ता कुनै पनि लक्षण देखिएको छ भने, ढिलाइ नगरी नजिकको स्वास्थ्य केन्द्रमा सम्पर्क गर्नुहोस्।

स्रोत: एजेन्सीकाे सहयाेगमा