रेन्को पेनले अन्तर्राष्ट्रिय आइकन अवार्ड्स २०२५ मा “बेस्ट ग्लोबल इमर्जिङ स्टेशनरी ब्रान्ड” उपाधि जित्यो

विराटनगर । नेपालको अग्रणी स्टेशनरी ब्रान्ड रेन्को पेन ले ऐतिहासिक सफलता हासिल गरेको छ। कम्पनीले अन्तर्राष्ट्रिय आइकन अवार्ड्स २०२५ मा बेस्ट ग्लोबल इमर्जिङ स्टेशनरी ब्रान्ड अवार्ड जित्दै नेपालको नाम विश्वभर उजागर गरेको छ। यो प्रतिष्ठित पुरस्कार बलिउड अभिनेत्री मलाइका अरोराले रेन्कोका प्रतिनिधिलाई प्रदान गरिन्।

रेन्को पेनले करिब ४५ वर्षदेखि नेपाली बजारमा अग्रणी स्थान बनाउँदै आएको छ। यसको उत्पादनहरू अद्वितीय डिजाइन, उत्कृष्ट लेख्ने अनुभव र भरपर्दो गुणस्तरका कारण ग्राहकबीच लोकप्रिय छन्। यो अवार्डले नेपालको स्टेशनरी उद्योगलाई विश्व स्तरमा चिनाउन कम्पनीले गरेको योगदानलाई सम्मानित गरेको हो।

रेन्को पेनका प्रबन्ध निर्देशक नविन झुनझुनवालाले यस अवसरमा सबैप्रति कृतज्ञता व्यक्त गर्दै भने: “यो पुरस्कार केवल रेन्कोका लागि मात्र होइन, यो सम्पूर्ण नेपालका लागि गौरवको विषय हो। हाम्रो यात्रामा साथ दिने शुभेच्छुक, साझेदार र नेपाली जनताले निरन्तर दिएको प्रेरणाको परिणाम हो,” उनले भने।

रेन्कोले सौन्दर्य, उपयोगिता र नवप्रवर्तनलाई मिश्रित गर्दै प्रिमियम स्तरका स्टेशनरी उत्पादनहरू बजारमा ल्याउने लक्ष्य राखेको छ। कम्पनीले हाल आन्तरिक बजारमा आफ्नो उपस्थिति विस्तार गर्दै निर्यातमा पनि उल्लेखनीय वृद्धि गरिरहेको छ।

हाल रेन्कोका उत्पादनमा पेन, मार्कर, गोंद स्टिक, स्केच पेन लगायतका स्टेशनरी सामग्रीहरू समावेश छन्। साथै, रेन्कोको छाता ब्रान्ड अन्तर्गत पार्कर, ब्रुस्ट्रो (कलात्मक सामग्री), गोरिल्ला टेप्स, अमिगो क्यालकुलेटर रहेका छन्। निकट भविष्यमै कम्पनीले स्टोरी पेन्सिल पनि बजारमा ल्याउने तयारी गरिरहेको छ।

यस अन्तर्राष्ट्रिय सम्मानले रेन्को पेनलाई विश्व बजारमा नेपालको प्रतिनिधि ब्रान्डका रूपमा स्थापित गर्ने मार्गमा बलियो कदम चाल्न मद्दत गर्ने अपेक्षा गरिएको छ।