गरिमा विकास बैंकले कमायो साढे २२ करोड नाफा

गरिमा विकास बैंक चालु आर्थिक वर्षको पहिलो त्रैमाससम्मको अपरिष्कृत वित्तीय विवरण सार्वजनिक गरेको छ । उक्त विवरण अनुसार यस अवधिमा बैंकले २२ करोड ५७ लाख ४३ हजार रुपैयाँ नाफा कमाएको छ ।

उक्त नाफा गत वर्षको सोही अवधिको तुलनामा १२ प्रतिशतले बढी हो । गत वर्षको सोही अवधिमा बैंकले २० करोड १५ लाख ५४ हजार रुपैयाँ नाफा कमाएको थियो ।

यस अवधिमा बैंकको ब्याज आम्दानी र सञ्चालन नाफा बढेका कारण नाफामा वृद्धि भएको हो । गत वर्षको असोज मसान्तसम्म ८८ करोड ८३ लाख रुपैयाँ रहेको बैंकको ब्याज आम्दानी बढेर ९८ करोड ६८ लाख लाख रुपैयाँ पुगेको छ ।

त्यस्तै बैंकको सञ्चालन मुनाफा १२ प्रतिशतले बढेर ३२ करोड २३ लाख रुपैयाँ भएको छ । समीक्षा अवधिमा बैंकको वितरणयोग्य मुनाफा ८ करोड ६९ लाख रुपैयाँ धनात्मक रहेको छ । गत वर्ष बैंकको वितरणयोग्य मुनाफा १७ करोड ४ लाख रुपैयाँ ऋणात्मक रहेको थियो ।

असोज मसान्तसम्म आइपुग्दा बैंकको खराब कर्जा बढेर ३.८२ प्रतिशत पुगेको छ । गत वर्षको बैंकको एनपीएल २.६८ प्रतिशत रहेको थियो ।

नाफासँगै बैंकको प्रतिशेयर आम्दानी पनि बढेको छ । गत वर्ष १४.१९ रुपैयाँ रहेको बैंकको प्रतिशेयर आम्दानी बढेर १५.९० रुपैयाँ पुगेको छ भने बैंकको प्रतिशेयर नेटवर्थ १६२.०७ रुपैयाँ रहेको छ ।